هره ورځ خلک غونډې کوي، لاریونونه کوي، اعتراضونه لري چې د سولې خبرو تر پيل دې تاوتریخوالی کم شي، تر څو رامنځ ته شوی فرصت له منځه لاړ نه شي.
خو طالبان د دې پر ځای چې د خلکو غږ واوري، مشکل درک کړي، وینه ودروي، تاوتریخوالی یې زیات کړی او درګرده لوی بریدونه کوي.
د تاوتریخوالي د کمولو غوښتنه د دې لپاره ده چې طالبان دې د ډله ییزو وژنو بریدونه ودروي، لوی موټر دې له باردو نه ډکوي، ځکه د هر موټر بم برید ملکیان قربانیان دي چې مالي او ځاني زیانونه ورته اوړي.
که طالبان د افغان ځواکونو هر مرکز باندې موټر بم برید کوي، شاوخوا خلک ورسره زیانمن کیږي، نو له همدې کبله ټینګار دا دی چې نباید ستر بریدونه وشي.
که طالبانو په تاوتریخوالي ګټلی، نو تیرو کلونو کې به یې یوه لاس ته راوړنه خو درلودلی، یواځې دا چې زیات خلک یې ووژل، زیات یې بې کوره کړل، زیات یې معلول کړل او زیات نور در په دره کړل.
تاسو ولیدل چې د سه شنبې ورځ سهار یې پکتیا ولایت کې د عامه نظم ساتنې پولیسو یو مرکز باندې موټر بم برید وکړ چې ملکي وګړي پکې هم زیانمن شوي و.
طالبان خو موټر له چاودیدونکو توکو ډک کړي، نور یې کیسه کې نه دي چې د چا خونه به پرې ورانیږي او څومره وینې به پرې توی کیږي.
طالبان په دې ډول بریدونو سره یواځې د هغو هېوادونو حق ادا کوي چې طالبانو ته پيسې او امکانات ورکوي، تر دې هاخوا طالبان هیڅ لاس ته راوړنه له دې بریدونو نه شي درلودلی.
دا چې خلک د سترو بریدونو د بندیدو او تاوتریخوالي د کمیدو غوښتنه لري، دا له دې کبله چې که طالبان لږ په خلکو زړه وسوځوي او نور له وینې تویدنې راوګرځوي.
طالبان په مخامخ جګړه کې هيڅ نه شي کولی، له مرګ ژوبلې سره مل هر برید یې ناکام وي، یواځینی موټر بم برید دی چې د عامو خلکو په سیمو کې یا امنیتي مرکز ته نږدې سیمه کې ورته چاودنه کوي او نسل وژنې پرې کوي.
طالبان په مخامخ جګړه کې مقابل لوري او ملکي وګړو ته تلفات نه شي اړولی، یواځینی د سړک غاړې ماین چاودنې او موټر بم بریدونه دي چې طالبان پرې بریالي کیږي او ډير کسان شهیدانوي او ټپيان کوي.
له همدې کبله خلک غواړي چې ماین چاودنې او ستر بریدونه چې ملکي وګړي یې قرباني دي، باید بند شي او د دې پر ځای سوله باندې تمرکز وشي.
اوس چې تر بل هر وخت دواړه لوري سولې ته نږدې شوي، طالبان هڅه کوي چې خپل باردو او ځآنمرګي ختم کړي چې بیا به یې پکار را نه شي.
