خبر و دیدگاه

د کابل نړیوال کنفرانس، هیلې او پرېکړې

kabul_conf_karzai

 

کابل په نږدې راتلونکی کې د یوې نړیوالې غونډې کوربه دی. په دې غونډه کې به، چې مشری او کوربه توب یې د افغانستان پرغاړه دی، د ۵۰ هېوادونو او تر دېرشو د ډېرو نړیوالو سازمانونو استازی ګډون کوی. افغان حکومت په دې نړیواله غونډه کې د افغانستان د پراختیا په اړه یوه بشپړه طرح وړاندې کوی او دا به په اثبات رسوی، چې په هېواد کې ډېر پرمختګ شوی او د لا پرمختګ او انکشاف په خاطر افغانستان ددې وړتیا لری، چې نورې نړیوالې مرستې او همکارۍ ترلاسه کړی. غونډه به له افغانستان سره د مرستو، له ترهګرۍ سره په مبارزه کې د سیمه ییزې همکارۍ، د بیا رغونې لپاره د اقتصادی مرستو او په هېواد کې د سولې ټینګښت په خا‌طر د ولسمشر د هلوځلو د ملاتړ په برخه کې توافقات کوی او دا هڅه به کیږی، چې نړیواله ټولنه په دریو راتلونکو کلونو کې له افغانستان سره له ۱۳ تر ۱۴ میلیاردو ډالرو پورې مرستې وکړی.

د کابل نړیوال کنفرانس د جوړاوی د مسوولانو په وینا، که چېرې دغه مرستې افغانستان ته ورکړل شی، په ملکی برخو کې به ولګول شی. د دوی په وینا، له بده مرغه د افغانستان په اړه په کور دننه او بهر یو منفی تصویر وړاندې کیږی، خو د افغانستان حکومت په بېلابېلو برخو کې ډېرې سترې لاسته راوړنې لری، چې هېرې شوې دی. د کابل نړیوال کنفرانس به د افغانستان د خصوصی سکټور استازو ته دا فرصت ورکړی، چې په ملی او نړیواله کچه خپلې ستونزې او اړتیاوې مطرح کړی. ددغه کنفرانس یو مهم هدف به اقتصادی وده او د افغانستان د خصوصی سکټور د بېلابېلو برخو پیاوړتیا وی. دغسې دغه هیله هم شته، چې کنفرانس د پانګونې ودې او د ملی اقتصاد په لاره کې د خصوصی برخې تقویې ته زمینه برابره کړی.

افغان امنیتی ځواکونه همدا اوس هغه پړاو ته رسېدلی، چې پخپله پوځی عملیات پلان او رهبری کړی او پخپله د هېواد له پولو او ملی ګټو دفاع وکړی. د ملی دفاع وزارت د چارواکو په وینا، په هېواد کې روان ۶۰ په سلو کې پوځی عملیات پخپله افغان ملی اردو او د افغانستان نور امنیتی ځواکونه پرمخ بیایی، چې دا د افغانستان د ځانی دفاع د پیاوړتیا او په خپلو پښو د افغان امنیتی ځواکونو د درېدو په برخه کې یو ښه زېری دی. په دې توګه افغان امنیتی ځواکونه ددې جوګه کېدای شی، چې په راتلونکو پنځو کلونو کې امنیتی چارې خپله پرغاړه واخلی او د هغو نیوکو او تبلیغاتو مخه هم ونیول شی، چې په ملی ، سیمه ییزه او نړیواله کچه په افغانستان کې د بهرنیو ځواکونو پر حضور کیږی.

ښه حکومتوالی او له اداری فساد سره مبارزه د افغانستان د حکومت په لومړیتوبونو کې شمېرل کیږی. ولسمشر حامد کرزی تل په خپلو ویناوو کې پر دې ټینګار کړی، چې په ادارو کې سالم کسان پر کار وګومارل شی او د اداری فساد، چې په ټوله کې د حکومت او نړیوالې ټولنې د بدنامۍ لامل ګرځی، مخه ونیول شی. د افرادو د ګومارنې په برخه کې د ولسمشر نوی فرمان د حکومت د جدی توب ښکارندویی کوی.

د افغانستان حکومت په لندن کنفرانس کې دخپلې طرحې د تطبیق په برخه کې د ملی پخلاینې او سیمه ییزې همکارۍ موضوع هم جدی نیولې ده. ګاونډیو هېوادونو ته د ولسمشر حامد کرزی سفرونه ښیی، چې افغانستان په سیمه ییزه او نړیواله دواړو کچو غواړی د ترهګرۍ اوسنۍ څپې له منځه لاړې شی. د ملی پخلاینې او سوله ییز حل په برخه کې د سولې ملی مشورتی جرګې جوړېدل یو رغنده ګام و، چې له وسله والو مخالفانو سره یې د خبرو اترو لپاره پر یوه ګډ میکانیزم موافقه وښوده. دغه میکانیزم به د کابل په نړیوال کنفرانس کې د سیمه ییز او نړیوال ملاتړ لپاره وړاندې کیږی.

په همدې توګه د افغانستان بودجې ته د مرستو لېږد د افغانستان د حکومت یوه مهمه غوښتنه ده، چې د چارو د ښه والی، ښې حکومتوالۍ او د اداری فساد د ورکاوی په برخه کې رغنده تمامېدای شی. همدا اوس ډېری مرستې پخپله مرستندوی هېوادونه لګوی، په داسې حال کې، چې افغان حکومت تر هرچا ډېر دا ظرفیت لری، چې مرستې پر سمو او وړ ځایونو ولګوی. دغه ټول هغه موضوعات دی، چې د کابل په نړیوال کنفرانس کې پرې خبرې کېدای شی، ځکه د چارواکو په وینا، دغه کنفرانس د لندن کنفرانس مکمل یا بشپړوونکی دی. افغان حکومت او ولس دغه کنفرانس ته ډېرې هیلې لری او تمه ده دغه کنفرانس د افغانستان په سیاسی، اقتصادی او بالاخره امنیتی پرمختګ او پراختیا کې رغنده رول ولوبوی.

نوشته های مشابه

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا